Ёдгор Обид
Умрим қиши. Хаёл суриб ётаман,
Гоҳо ширин орзуларга ботаман.
Ўйларимни қўзғар ширин овозинг...
Қалдирғочим, сени қайдан топаман!
Гарчи тақдир синовлари кўп бўлди,
Умрим бори - нотинч, талотўп бўлди,
Боринг билдим. Кўнгил тўлди. Ҳўб бўлди...
Қалдирғочим, сени қайдан топаман!
Кўнгил уйин пештоқида жойинг бор,
Келолмайсан. Боролмам. Дил интизор.
Бу кенг дунё икки жонга шунча тор...
Қалдирғочим, сени қайдан топаман!
Жисму - боринг битилмаган ғазалсан,
Сасинг гўзал, қалбинг гўзал... гўзалсан.
Эрк орзуси рамзи каби азалсан...
Қалдирғочим, сени қайдан топаман!
Туркистоннинг баҳори бор, қиши бор,
Яйраб - яшнаб яшашликка ҳуши бор.
Умиди бор, сендай, мендай қуши бор...
Қалдирғочим, сени қайдан топаман!
Манба: facebook.com