Бугун яна баҳорингдаман, Сенсиз оқар анҳорингдаман. Жим ёт болам чўчимагин ҳеч, Қошингдаман, мен ёнингдаман. Қоним болам, болажонима, Жоним болам, болажонима.
Қаро тупроқ остидасан мум, Онам! Деган забонларинг жим, Кеттинг болам қаддимни букиб, Қолавердим ортингдан юм-юм. Қоним болам, болажонима, Жоним болам, болажонима.
Хонанг бўйлаб исларинг қолган, Кенг ҳовлида изларинг қолган, Йўл пойласам, йўлинг пойласам, Кўзларимда кўзларинг қолган. Қоним болам, болажонима, Жоним болам, болажонима.
Муҳаббатдан этган пайвандим, Қайдан топай оҳ, жигарбандим. Кенг дунёга сиғмаган болам, Дилбандимсан о, асал қандим. Қоним болам, болажонима, Жоним болам, болажонима.
Қабринг силаб меҳрингни туйсам, Куйган дилим, эркалаб суйсам. Соғинчимни совутмоқ учун, Тупроғингни ўпибла тўйсам. Қоним болам, болажонима, Жоним болам, болажонима.
Баҳор келди, севган баҳоринг. Тараннумбахш тонги наҳоринг, Жим ёт болам, хотиржам ётгин, Тўлиб оқди қайта анҳоринг. Қоним болам, болажонима, Жоним болам, болажонима.
|