ПАХТАЗОР БОЛАЛАРИ (шу номли туркумдан икки шеър)
Ёдгор Обид
1.
Қора совуқ. Аччиқ шамол. Зап увуллар...Зап увуллар. Этак тутиб борар беҳол - Жажжи қуллар...Жажжи қўллар.
Йиртиқ калиш. Энгил - юпун. Тезроқ чиқақолсайди кун... Титраб борар ўҳтин - ўҳтин - Жажжи қуллар...Жажжи қўллар.
Мурғак ўйлар. Ширин хаёл - Бари завол... Бари завол. Ўз элида - ўзи увол... Жажжи қуллар... Жажжи қўллар.
Эгат - эгат. Этак - этак, Чаноқ тилган қонли билак. Мурғак умри - мудҳиш эртак - жажжи қуллар... жажижи қўллар.
2.
Қоронғи тушиб қолди, Белим увушиб қолди. Ҳайҳотдек пахтазорда - Жинлар қувишиб қоди.
Бақирсам - йўқ товушим, Эски, йиртиқ ковушим. Қўлим тутсам кўзёшга - Тўлиб кетар ҳовучим.
Ҳаммаёқ ҳувилайди, Бўрилар увилайди. Шитирлаган нарсадан - Юрагим шувилайди.
Ғўза бўйимдан баланд, ҳечким кўрмас тутсам қад. Аммо қад ҳам тутолмам, Чайқалади ер ғалат...
Пахта тўла этагим, Ёмон оғрир кўкрагим. Этакни ёстиқ қилиб - Ётсам тугар эртагим...
|